Այսօր՝ մայիսի 19-ին, Գորիսի պետական քոլեջ այցելեց Եվրոպական ներդրումային բանկի Հայաստանի պետական հատվածի վարկավորման գործառնությունների պատասխանատու Ստեֆանի Գիար-Բրանին:

Եվրոպական ներդրումային բանկը նախատեսում է ծրագրերի մեկնարկ Սյունիքի մարզում:

Ծրագրերն ուղղված կլինեն կրթական, առողջապահական, սոցիալական եւ այլ ոլորտների բարելավմանն ու զարգացմանը:

Այցը Գորիսի պետական քոլեջ ճանաչողական նպատակ ուներ:

Կրթօջախի տնօրեն Կարեն Լազարյանը Ստեֆանի Գիար-Բրանիին ներկայացրեց քոլեջի շենքային պայմանները, ինչպես և շենքի ջեռուցմանն ու վերանորոգմանը, ապաստարանի արդիականացմանը, ուսումնանյութական բազայի հարստացմանն ու վերազինմանն առնչվող խնդիրները՝ ակնկալելով աջակցություն այդ հիմնախնդիրների լուծման ճանապարհին:

Հանդիպման ավարտին Կարեն Լազարյանը շնորհակալություն հայտնեց Եվրոպական ներդրումային բանկի ներկայացուցչին՝ Գորիսի պետական քոլեջ այցելելու եւ կրթօջախի մտահոգությունների հանդեպ հետաքրքրություն ցուցաբերելու համար: