Ուսանողներն այսօր էլ ակնածանքով են հիշում իրենց կրթօջախի շրջանավարտ, հայ արձակի նահապետ Սերո Խանզադյանին
Ս.թ. դեկտեմբերի 13-ին, Գորիսի պետական քոլեջում տեղի ունեցավ գրական ցերեկույթ՝ նվիրված 20-րդ դարի երկրորդ կեսի հայ արձակի նահապետ, մեր մեծ հայրենակից Սերո Խանզադյանին:
Գորիսի պետական քոլեջում հպարտությամբ են նշում փաստը, որ գրողը քոլեջի (նախկինում տեխնիկում) ուսանող էր: Խանզադյանը իր ինքնակենսագրականում գրել է. «1934 թվականին ես ավարտեցի մեր քաղաքի մանկավարժական տեխնիկումն ու նշանակվեցի Տաթեւ գյուղի յոթնամյա դպրոցում մայրենի լեզվի եւ գրականության դասատու…»:
Ցերեկույթը նշանավորվեց նրանով, որ քոլեջում բացվեց Սերո Խանզադյանին նվիրված անկյուն, որը ժամանակի ընթացքում կհարստանա նրա մասին պատմող նյութերով, ինչպես նաեւ գրողի գրական ժառանգությունը ներկայացնող ցուցանմուշներով:
Ուսանողները անդրադարձ կատարեցին գրողի կենսագրական եւ ստեղծագործական ուղղուն՝ մասնավորապես ներկայացնելով նրա նշանավոր ստեղծագործությունները, որոնցից հավերժորեն ծորում է հայրենասիրության եւ հայրենատիրության գաղափարը:
Ցերեկույթը նախաձեռնել էր կրթօջախի ուսումնադաստիարակչական աշխատանքների գծով կազմակերպիչ Օվսաննա Մաշուրյանը:
